بنات انا هقبض جمعية ان شاء الله 60 الف ف شهر 12 هل يكفوا المفروشات والهدوم كلها بيتي وخروج…

أنا شايفة انك الشهر اللي جاي تخلصي جزء الهدوم الصيفي أو عالاقل هدوم الخروج في التصفيات أو جزء منها لو مش هتقدري ولمي شوية من هدوم البيت من محل الموجي وشوفي مكاتب الجملة برضو ده هيفرق معاكي لأن الحاجات كده كده بتغلى فممكن تجيبي جزء وكملي الباقي في التصفيات على شهر ٩ أو ١٠ ولما تقبضي الجمعية هاتي هدوم الشتوي للبيت الاول ولو في وقت استنى في التصفيات على شهر ٢ هاتي هدوم الخروج ولو مفيش شوفي العروض او محلات اسعارها معقولة ١٢ هتبقي في عز موسم الشتاء والبطاطين بتكون أسعارها عالية شوية فمش عارفة انصحك في نقطة المفروشات أوي بس وقتها هاتي الملايات والفوط طبعاً بس اسألي في نقطة البطاطين إيه أحسن وقت تشتريهم فيها و ربنا يتمملك على خير يا جميلة ❤️❤️

روحي عند الهدير مول هتخلصي كل حاجه من المفروشات ب ٣٠ ل ٣٥ الباقي جيبي بيه بقيت الحاجات

المفروشات لوحدها هتبقى ٤٠ الف تقريبا وممكن يزيدو ع حسب المكان اللى هتجيبي منه علشان تجيبي اللحافين الأساسي والاطفال والبطاطين حاجة كويسة لأنك مش بتبدلى فيهم كل يوم زى المفارش و المفارش هتجيبي اتنين تلاتة عالى و الباقى وسط وممكن تجيبي واحد اقل شوية معاهم وكذلك الفوط بتجيبي مثلا ٣ علب كويسين زى السروجى مثلا و الباقى اقل منه شوية وهكذا متجيبيش كله غالى علشان توفري بس متجيبيش كله رخيص برضو علشان مش بيعيش يعنى خير الامور اوسطها المفروشات جيبيها من المحلة هتوفري مبلغ كبير ولو عاوزة تنزلى ع مكان تجيبي المفروشات كلها من عنده روحى عند حازم الشربينى أسعاره كويسة جدا